"MOVÉMONOS GLOBALIZANDO". MMAF.

venres, 14 de novembro de 2014

mércores, 12 de novembro de 2014

O MAGOSTO.

Nesta sesión traballamos coa temática do Magosto. Como o tempo non nos permitiu xogar fóra fixémolo dentro do ximnasio.
Encontrámonos cuns monstros moi raros que comían castañas, cos donos dun castaño que non querían compartir, cantamos todos xuntos "Tres castañas polo chan", bailamos "O Rap do Magosto"... Seguimos vivindo numerosas aventuras!

Slideshow made with Smilebox

7ª SESIÓN

Unidade 3. A SAÚDE Sesión 7.

Obxectivos.

Traballar a temática do Magosto, esta semana celebramos o magosto.

Buscar novos números do 200-999 e conceptos como anterior, posterior, maior, menor, igual, par, impar, suma, etc.

Materiais.

Castiñeiro de cartón, monstros traga castañas, cubeletes para encestar castañas, castañas, rotuladores e lousa branca, bancos suecos, música, ximnasio...

PARTE INICIAL.

A ROUBAR CASTAÑAS.

No fondo do ximnasio temos un castiñeiro que ten moitas castañas tiradas polo chan. Os nenos intentarán recollelas dunha en unha, pero o amo ou amos do castiñeiro non llo permitirán.

O camiño da escola ao castaño estará ocupado por algúns madeiros (bancos suecos).

Se son atrapados polos donos do castaño deberán devolver a castaña (se teñen algunha) e subir a un madeiro. Os compañeiros poderán salvar aos pillados, terán que ir aos madeiros darlles a man e volver á casa collidos da man.

Non podemos facer as dúas cousas á vez nunha acción, ou salvamos un compañeiro ou roubamos a castaña.

Mentres salvamos un compañeiro, o dono pódenos pillar.

PARTE PRINCIPAL.

LANZAMENTO DE CASTAÑAS.

Formaremos dous equipos. Teremos dúas estacións de lanzamento. Nunha delas estarán os pozos de castañas e na outra os monstros das castañas. As dúas estacións terán tres zonas de lanzamento que representarán ás centenas, decenas e unidades.

Cada alumno terá unha castaña e decidirá probar sorte nas centenas, decenas ou unidades.

Despois do lanzamento comprobaremos cantas castañas temos en cada posición e que número formamos.

Cada grupo escribirá o seu número (2C-3D-7U =237) nunha lousa branca e a partir de aí traballaremos maior, menor, igual, anterior, posterior, par, impar, facer sumas, etc.

Podemos repetir os lanzamentos tantas veces como vexamos.

VOLTA Á CALMA.

TRES CASTAÑAS POLO CHAN.

Os alumnos forman unha roda sentados no chan .Un compañeiro queda fóra da roda cunha castaña. Mentres cantamos un fragmento da canción de Susa Herrera "Tres castañas polo chan", o compañeiro intentará pousar a castaña detrás dun compañeiro da roda. Ao rematar a canción o compañeiro sentado intentará atrapar ao outro antes de que se sente no seu lugar, pero primeiro deberá dar unha ou dúas voltas arredor da roda.

Repetiremos o xogo varias veces.

DENTRO DA CASTAÑA.

Cantar todos xuntos "Dentro da castaña" de Juan J. Varela Álvarez.

OBSERVACIÓNS.